Azərbaycan Respublikası Vergilər Nazirliyinin www.taxes.gov.az domen adlı İnternet saytının monitorinqinin yekunları /İCMAL/

posted by

Azərbaycan Respublikası Vergilər Nazirliyinin www.taxes.gov.az domen ünvanlı İnternet saytı, hiss edilir ki, yenə də öncüllüyünü qoruyacağa bənzəyir. Baxmayaraq ki, əvvəlki variantda da sayt yetərincə təkmil sayıla bilərdi, onun üzərində son aylarda aparılan təkmilləşdirmə işi bu resursu müasir tələblərə yüksək səviyyədə cavab verə biləcək həddə çatdırıb. Əlbəttə, bu cür nümunə olması baxımından nazirliyin saytı çox sevindiricidir. Bununla belə onu da qeyd etməliyik ki, saytda bəzi informasiyaların çatışmadığı da hiss edilməkdədir. Ümumi mənzərə isə aşağıdakı kimidir:

1. Qurumun özü haqqında bilgilər mükəmməl hesab edilə bilər. Çatışmayan daha öncə ona başçılıq etmiş şəxslər barədə ayrıca bilginin olmamasıdır.

2. Ziyarətçilərin əks əlaqəsi üçün ən mükəmməl imkanlar təklif edilir.

3. Qurumun strukturu da öz mükəmməlliyi ilə seçilir. İrad tutulacaq heç bir yönü yoxdur.

4. Rəhbər və rəhbər işçilər haqqında, əks əlaqə imkanları barədə bilgilər yetərincə sayıla bilərdi. Ancaq burada struktur bölmələrinin rəhbərləri barədə biografik bilgilər gözə dəymir.

5. Qurumun cari fəaliyyəti barədə bilgilər mükəmməldir.

6. Ümumi dövlət büdcəsinin rəqəmlə ifadəsi və onun quruma aid hissəsinin ayrıntıları barədə bilgi verilsə də burada bəzi çatışmazlıqlar var.

7. Qurum tərəfindən təklif edilən xidmətlər barədə bilgilər də yetərli sayıla bilər.

8. Boş iş yerləri və işə qəbul qaydaları barədə bilgilər tam deyil. Burada mümkün komissiyalar və qurum daxilində ixtisas dəyişmə imkanları barədə bilgi yoxdur.

9. Sahə işçilərinin əmək haqları barədə bilgi verilmir.

10. Ayrı-ayrı vəzifəli şəxslər tərəfindən vətəndaşların qəbul vaxtları göstərilsə də qəbulun qaydaları və qəbuldan imtinanın əsasları barədə heç nə deyilmir.

11. Tender və müsabiqələr barədə bilgilər də tam sayıla bilməz. Burada tenderlərin nəticələri haqqında, həmçinin bu sahədə ortaya çıxan mübahisələrin həlli qaydaları barədə bilgi verilmir.

12. Qurumun norma- (qanun)yaratma fəaliyyəti yetərli sayıla bilər.

13. Saytın texniki imkanları ən mükəmməl səviyyədədir.