Azərbaycan Respublikası Daxili İşlər Nazirliyinin www.din.gov.az domen adlı İnternet saytının monitorinqinin yekunu /İCMAL/

posted by

Azərbaycan Respublikası Daxili İşlər Nazirliyinin www.din.gov.az domen ünvanlı İnternet resursu ən iddialı, həm də iddialı olmağa haqqı çatan resurslardan biridir. Sayt ilk baxışdan öz zənginliyi, çevikliyi və funksionallığı ilə diqqəti cəlb edir. Bu da təsadüfi deyil. Çünki saytın qurucuları bu resursu çağdaş texnologiyaların imkan verdiyi ən yüksək səviyyədə tərtib edərək işləməsi üçün ciddi səy göstərməkdədir. Üstəlik saytın istifadə rahatlığı da xüsusi qeyd edilməlidir. Bununla belə bu resursda da çatışmayan yönlər vardır ki, onlar haqqında aşağıda söz açmaq fikrindəyik.

1. Qurum haqqında bilgilər yetərincədir və yüksək səviyyədə tərtib edilib.

2. Ziyarətçilərin əks əlaqəsi üçün mümkün olan bütün imkanlar təklif edilib. Ancaq quruma başqa yerlərdən getmək üçün marşrut və ictimai nəqliyyat haqqında bilgi verilmir.

3. Qurumun strukturu haqqında sxem verilməsə də, struktur ən xırda ayrıntılarına qədər təsvir edilib. Hətta ucqar bir kənddəki ən adi sahə müvəkkilliyi haqqında belə bilgi verilir.

4. Rəhbərin özü, müavinləri və bir sıra vacib strukturların rəhbərləri haqqında yetərincə bilgi və əks əlaqə imkanları təqdim edilir.

5. Qurumun cari fəaliyyəti haqqında bilgilər ətraflı şəkildə təqdim edilir.

6. Ümumi dövlət büdcəsi ilə bağlı hər hansı bilgi yoxdur.

7. Qurum tərəfindən təklif edilən bütün xidmətlər haqqında bilgi verilir. Yalnız əlavə xidmətlər və onların qiymətləri haqqında bilgi yoxdur.

8. Boş iş yerləri və işə qəbulla bağlı bilgilər yetərli səviyyədə sayıla bilər. Ancaq işə qəbulun nəticələri haqqında heç bir bilgi yer almır.

9. Qurumun işçilərinin əmək haqları ilə bağlı heç bir məlumat verilmir.

10. Vətəndaşların qəbulu ilə bağlı məlumatlar ətraflı şəkildə təqdim edilir.

11. Tender və yarışmalar haqqında hər hansı bilgi verilmir.

12. Qurumun norma- (qanun)yaratma fəaliyyəti haqqında da bilgilər saytda öz əksini tapmayıb.

13. Saytın texniki imkanları yüksək səviyyədədir və lazımlı bütün bilgilər saytda öz əksini tapmışdır.