Azərbaycan Respublikası Mədəniyyət və Turizm Nazirliyinin www.mct.gov.az domen ünvanlı İnternet resursu ilk baxışdan zəngin sayt təsiri bağışlayır. Burada ölkə turizmi və mədəniyyəti haqqında olduqca faydalı bilgilər toplanıb. Araşdırmaçılar və sadəcə bu sahəylə maraqlananlar üçün faydalı bir resurs hesab etmək olar. Bununla bərabər saytda “İnformasiya əldə etmək haqqında” qanunda nəzərdə tutulan informasiyaların da bir qimi yer alıb. Ancaq bu heç də o demək deyil ki, gərəkli bütün bilgilər saytda yerləşdirilib. Bəzi informasiyalar haqqında səhifələrə keçid verilsə də onlar çox zaman boş çıxır. Yerdə qalanların bir qismi isə yetərincə mükəmməl sayıla bilər.
1. Qurumla bağlı informasiyaları yetərli saymaq olardı. Lakin burada bu vaxta qədər nazirliyə başçılıq etmiş şəxslər haqqında bilgi yoxdur. Yalnız hazırkı nazir haqqında bilgi verilir.
2. Ziyarətçilərin əks əlaqəsi üçün imkanlar yetərli deyil. Qurumun yeri, bir ümumi e-poçt ünvanı, telefon və faks nömrələri verilib. Ancaq quruma başqa yerlərdən getmək üçün marşrut və ictimai nəqliyyat haqqında bilgi verilmir.
3. Qurumun strukturunun sxemi verilməsə də ümumi bilgilər və struktur bölmələrinin rəhbərlərinin adları təqdim edilir. Lakin onlarla əks əlaqə üçün ayrıca imkan təklif edilmir. Struktur bölmələrinin səlahiyyət çərçivələri haqqında bilgi verilsə də onların yerləşdiyi ünvan haqqında heç bir bilgi yoxdur.
4. Əsas rəhbər və müavinləri haqqında bioqrafik bilgilər verilib. Ancaq struktur bölmələrinin rəhbərləri haqqında bunu demək olmaz. Əks əlaqə üçün isə sadəcə ümumi imkanlar təklif edilir.
5. Qurumun cari fəaliyyəti haqqında bilgilər ətraflı şəkildə təqdim edilməklə yanaşı quruma aid hər cür başqa informasiyalar da saytda yer alıb. Ancaq qurumun həyata keçirdiyi proqram və layihələr haqqında, eyni zamanda qurumdaxili əmr və qaydaların reyestri barədə heç bir məlumat yoxdur.
6. Ümumi dövlət büdcəsi ilə bağlı heç bir bilgi verilmir.
7. Qurum tərəfindən təklif edilən xidmətlər haqqında yarımçıq da olsa bilgi var. Ancaq xidmətlərin siyahısı ayrıca təqdim edilmir. Həmçinin xidmətlər üçün tələb olunan rüsumlar haqqında bilgilər də əlçatan şəkildə deyil.
8. İşə qəbul qaydaları və boş iş yerləri haqqında heç bir məlumat təqdim edilmir.
9. Sahə işçilərinin əmək haqları ilə bağlı da heз bir məlumat verilmir.
10. Vətəndaşların qəbul günləri və saatları haqqında yetərli bilgi verilsə də qəbul qaydaları, qəbuldan imtinanın əsasları və mübahisələrin həlli haqqında heç bir bilgi yoxdur.
11. İlk baxışdan tender və yarışmalar haqqında bilgi verildiyi görüntüsü yaransa da bölmə boşdur.
12. Qurumun norma- (qanun)yaratma fəaliyyəti haqqında heç bir bilgi yoxdur.
13. Saytın texniki imkanlarını kafi hesab etmək olar.