Azərbaycan Respublikası Səhiyyə Nazirliyinin www.sehiyye.gov.az domen adlı İnternet resursunda çatışmazlıqlar olsa da onun işini təkmilləşdirmək mümkündür. Yəni bu saytın üzərində müəyyən işləri aparmaqla onun informasiya təminatını yaxşılaşdırmaq olar. Aşağıdakı bəndlər üzrə təklif edəcəyimiz tövsiyələr də elə buna hesablanıb.
1. Qurumun özü haqqında bilgilərə hazırkı nazir, onun müavinləri, həmçinin quruma daha öncə başçılıq etmiş şəxslər haqqında bioqrafik bilgiləri əlavə etmək gərəklidir.
2. Ziyarətçilərin əks əlaqəsini yaxşılaşdırmaq üçün qurumun yerləşdiyi ünvanın sxemi, quruma başqa yerlərdən getmək üçün marşrut və ictimai nəqliyyat haqqında bilgilərin saytda yer alması gərəklidir.
3. Yaxşı olardı ki, qurumun strukturu sxem şəklində təqdim edilsin. Həmçinin onun struktur bölmələri haqqında gərəkli bilgilər – onların ünvanları və səlahiyyət çərçivələri barədə informasiyalar burada əks etdirilsin. Üstəlik, struktur bölmələrinin rəhbərləri ilə əks əlaqə imkanlarının, onların bioqrafiyalarının burada yerləşdirilməsi tövsiyə edilir.
4. Yaxşı olardı ki, nazir də daxil olmaqla bütün rəhbər işçilər haqqında bilgi verilsin. Həm də onlarla əks əlaqə üçün ayrıca imkanlar təklif edilsin.
5. Qurumun cari fəaliyyəti haqqında bilgilərə qurumun həyata keçirdiyi proqram və layihələr, həmçinin qurumdaxili əmr və sərəncamlar, onların reyestri haqqında bilgi verilməsi də gərəklidir.
6. Ümumi dövlət büdcəsi üzrə bilgilər mütləq şəkildə təqdim edilməlidir.
7. Qurum tərəfindən təklif edilən xidmətlər bölməsində pullu xidmətlərin siyahısı və onların qiymətlərinin müəyyənləşmə qaydaları haqqında bilgi verilməsi zəruridir.
8. Yaxşı olardı ki, qurumun kadr siyasəti haqqında ayrıntılı bilgi verilsin. Həm də boş iş yerləri haqqında elanların çox köhnə olması diqqətə alınmalıdır.
9. Sahə işçilərinin əmək haqları üzrə bilgilərin də təqdim edilməsi gərəklidir.
10. Vətəndaşların qəbul şərtləri və qəbul günləri (saatları) haqqında təəccüb doğuracaq bilgi yoxluğunun aradan qaldırılması gərəklidir.
11. Tender və yarışmalar haqqında bilgilərə ən yeni elanlarla bərabər tender və yarışmaların keçirilmə qaydaları, onların nəticələri, mübahisələrin həlli yolları haqqında bilgilərin verilməsi zəruridir.
12. Qurumun norma- (qanun)yaratma fəaliyyəti haqqında bilgilərin təqdim edilməsi gərəklidir.
13. Saytın texniki imkanları sırasına abunə və əks əlaqə üçün onlayn forma (əgər sual vermək üçün formanı nəzərə almasaq) əlavə etmək lazımdır.