Azərbaycan Respublikası Nəqliyyat Nazirliyinin www.mot.gov.az domen adlı İnternet saytının monitorinqinin yekunu /İCMAL/

Azərbaycan Respublikası Nəqliyyat Nazirliyinin www.mot.gov.az domen adlı İnternet resursu heç də adına uyğun dəyərləndirilə bilməz. Sayt dövrün texnoloji imkanları ilə heç bir formada ayaqlaşacaq durumda deyil. Bununla belə saytda faydalı sayıla biləcək informasiyalar da az deyil. Yalnız bu informasiyaların yetərli sayılması baxımından problemlər mövcuddur. Ümumi mənzərə ondan ibarətdir ki, bu sayt yetərincə zəngin və istifadə üçün funksional sayıla bilməz. Aşağıda saytda gördüklərimizi bölmələr üzrə təqdim edirik.

1. Qurumun özü ilə bağlı informasiyalar yetərli sayılacaq həddədir. Yalnız bu vaxta qədər quruma başçılıq edən şəxslər haqqında bilgi çatışmır. İndiki nazirin isə həm bioqrafiyası, həm də onunla əks əlaqə imkanları, qəbul günləri (vaxtları) təqdim edilir.

2. Ziyarətçilərin əks əlaqəsi üçün qurumun yer və e-poçt ünvanları, telefon və faks nömrələri təqdim edilir. Ancaq bura gəlmək üçün ictimai nəqliyyat vasitələri haqqında, həmçinin qurumun ünvanının marşrut və sxemi barədə bilgi yoxdur.

3. Qurumun strukturunun optimal sayıla biləcək sxemi və sxem üzərində göstərilən struktur bölmələrinə keçidlər də verilir. Lakin struktur bölmələrinin ünvanları və onların səlahiyyət çərçivələri haqqında bilgi verilmir.

4. Nazir və onun bir müavininin bioqrafiyası verilib. Digər müavinin bioqrafiyası və həmçinin ayrı-ayrı struktur bölmələrinin rəhbərləri haqqında bu bilgilər isə təqdim edilmir. Əks əlaqə imkanları isə yetərli sayıla biləcək həddədir.

5. Qurumun cari fəaliyyəti haqqında informasiyalar yetərincə çevik təsir bağışlamır. Ancaq ümumi mənzərə yaxşıdır. Qurumdaxili əmr və sərəncamlar haqqında bilgi verilmir. Və təbii ki, bu cür bilgilərin reyestri də yoxdur.

6. Ümumi dövlət büdcəsi ilə bağlı hər hansı bir informasiya yoxdur.

7. Qurum tərəfindən təklif edilən xidmətlərin beş bəndi üzrə informasiyaları yetərli hesab etmək olar. Təklif olunan xidmətlər, onlardan istifadə üsulları, xidmətlərin qiymətləri barədə bilgilər isə saytda öz əksini tapmışdır.

8. Boş iş yerləri və işə qəbulla bağlı heç bir informasiya verilmir.

9. Sahə işçilərinin əmək haqları barədə də yuxarıdakı sözləri demək olar.

10. Vətəndaşların qəbulu ilə bağlı informasiyaların beş bəndindən yalnız biri üzrə bilgi verilib: ayrı-ayrı vəzifəli şəxslər tərəfindən vətəndaşların qəbul günləri və saatları açıqlanır. Ancaq bu da optimal sayıla biləcək formada deyil. Misal üçün, nazirin qəbul günü (saatı) haqqında bilgini onun bioqrafiyasına əlavə kimi görmək olar ki, bu da az ağlabatandır. Qəbul qaydaları, qəbuldan imtinanın əsasları və mübahisələrin həlli yolları haqqında bilgilər isə yoxdur.

11. Tender və yarışmalar haqqında da faktiki heç bir bilgi verilmir.

12. Qurumun norma- (qanun)yaratma fəaliyyəti haqqında bilgilər saytda öz əksini tapmayıb.

13. Saytın texniki imkanları normal sayıla bilər. Ancaq tərtibatına yenidən əl gəzdirilməsinə ehtiyac var. Saytda əks əlaqə üçün onlayn forma verilsə də onu optimal saymaq olmaz. Üstəlik abunə imkanı da təklif edilmir.