Azərbaycan Respublikası Müdafiə Sənayesi Nazirliyinin www.mdi.gov.az domen adlı İnternet saytının fəaliyyətinin təkminləşdirilməsi ilə bağlı TÖVSİYƏLƏR

Azərbaycan Respublikası Müdafiə Sənayesi Nazirliyinin www.mdi.gov.az domen ünvanlı İnternet saytının durumu onun üzərində hələ çox iş getməli olduğundan xəbər verir. Saytda bəzi informasiyalar olsa da bir çox əsas bilgilər yoxdur. Bununla belə onun təkmilləşdirilməsi imkanları da yox deyil. Məhz bu durumu nəzərə alaraq aşağıda saytın təkmilləşdirilməsi üçün bəzi tövsiyələrimizi dilə gətiririk.

1. Qurum haqqında bilgilər sırasına sahəyə bu vaxtadək başçılıq edən şəxslər haqqında bilgilərin təqdim edilməsi yaxşı olardı.

2. Ziyarətçilərin əks əlaqəsi üçün gərəkdir ki, burada mümkün olan bütün telefon, faks nömrələri, e-poçt ünvanları, həmçinin quruma gəlmək üçün ictimai nəqliyyat imkanları, onun marşrut və sxemi təqdim edilsin.

3. Qurumun strukturunun sxem şəklində təqdim edilməsi, eyni zamanda struktur bölmələri haqqında bilgin verilməsi gərəklidir.

4. Rəhbər, rəhbər işçilər və onlarla əks əlaqə ilə bağlı nazirin bioqrafiyası ilə yanaşı onun müavinlərinin və bütün struktur bölmələri rəhbərlərinin bu cür bilgiləri təqdim edilməli, həmçinin onların hər biri ilə əks əlaqə imkanları ayrıca təklif edilməlidir.

5. Qurumun cari fəaliyyəti haqqında bilgilərdə ən vacibi gündəlik informasiyalardır ki, saytda bu çatışmır. Qurumdaxili əmr və sərəncamlar, onların reyestri, qurumun həyata keçirdiyi proqram və layihələr barədə bilgilər də sayta əlavə olunmalı informasiyalardır.

6. Yaxşı olardı ki, büdcə ilə bağlı məsələlər haqqında bilgi verilsin.

7. Qurum tərəfindən təklif edilən xidmətlər və onların qiymətləri haqqında bilgi verilməsinə gərək duyulur.

8. Boş iş yerləri və işə qəbulla bağlı bilgilərin təqdim edilməsi faydalı olardı.

9. Sahə işçilərinin əmək haqları barədə bilgilərin daxil edilməsi tövsiyə olunandır.

10. Vətəndaşların qəbul günləri və saatları ilə bərabər qəbul qaydaları, qəbuldan imtinanın əsasları və mübahisələrin həlli yolları haqqında bilgi verilməsi gərəklidir.

11. Tender və yarışmalar haqqında bilgilərin təqdim edilməsi lazımlıdır.

12. Qurumun norma- (qanun)yaratma fəaliyyətinin işıqlandırılması gərəklidir.

13. Saytın texniki imkanları sırasına abunə və onlayn müraciət forması da əlavə edilməlidir.