Azərbaycan Respublikası Müdafiə Sənayesi Nazirliyinin www.mdi.gov.az domen adlı İnternet saytının monitorinqinin yekunu /İCMAL/

Azərbaycan Respublikası Müdafiə Sənayesi Nazirliyinin www.mdi.gov.az domen adlı İnternet resursu funksionallıq baxımından normal və praktik sayıla bilər. Ancaq bu heç də onun yetərincə dolğun olmasına dəlalət etmir. Saytda bir sıra bilgilər var. Bununla belə daha vacib bilgilərin çoxu yerli-dibli yoxdur, yaxud da onlara aid başlıqlar olsa da (məsələn, tenderlər, elanlar kimi) açılan səhifələr boşdur. Saytın ümumi mənzərəsi aşağıdakı kimidir.

1. Qurum haqqında bilgilər yetərli sayıla biləcək qədərdir. Çatışmayan yalnız nazirliyə bu vaxta qədər başçılıq etmiş şəxslər haqqında bilgilərdir. Düzdür, nazirlik qurulduğu gündən ona yalnız bir şəxs başçılıq edir. Ancaq buna baxmayaraq sahəyə bu vaxtadək başçılıq edən şəxslər haqqında bilgi vermək olardı.

2. Ziyarətçilərin əks əlaqəsi üçün qurumun ünvanı təqdim edilir. Ancaq telefon və faks nömrələri, e-poçt ünvanları haqqında yarımçıq məlumat, qurumun ünvanının marşrut və sxemi, oraya gəlmək üçün ictimai nəqliyyat haqqında isə heç bir məlumat verilmir.

3. Qurumun strukturu haqqında demək olar ki, bilgi yoxdur. Yalnız onun tabeliyində olan müəssisələr barədə bilgi verilsə də bu bilgilər belə yetərli sayıla biləcək qədər deyil.

4. Rəhbər və rəhbər işçilər haqqında bilgiləri tam və dolğun hesab etmək olmaz. Nazirin bioqrafiyası verilsə də onun müavinləri və struktur bölmələrinin rəhbərləri barədə belə bilgilər verilmir. Həm də əks əlaqə üçün imkanlar ümumi şəkildə və zəif təqdim edilir.

5. Quruma aid hər cür başqa informasiya və cari informasiya üzrə bilgi verilir. Mətbuat üçün açıqlamalar olduqca köhnədir. Qurumdaxili əmr və sərəncamlar, onların reyestri, qurumun həyata keçirdiyi proqram və layihələr barədə isə heç bir bilgi təqdim edilmir.

6. Ümumi dövlət büdcəsi ilə bağlı hər hansı bilgi yoxdur.

7. Qurum tərəfindən təklif edilən xidmətlər haqqında bilgi verilmir.

8. Eyni vəziyyət boş iş yerləri və işə qəbulla bağlı da müşahidə olunur.

9. Sahə işçilərinin əmək haqları barədə də heç bir bilgiyə rast gəlmək mümkün deyil.

10. Vətəndaşların qəbulu ilə bağlı yalnız qəbul günləri və saatları haqqında bilgi verilir.

11. Tender və yarışmalar haqqında hər hansı bilgi verilmir.

12. Qurumun norma- (qanun)yaratma fəaliyyəti haqqında da heç bir bilgi təqdim edilmir.

13. Saytın texniki imkanları normal olsa da abunə və onlayn müraciət forması yoxdur.