Azərbaycan Respublikası Diasporla İş üzrə Dövlət Komitəsinin www.diaspora.gov.az domen adlı İnternet saytının monitorinqinin yekunu /İCMAL/

Azərbaycan Respublikası Diasporla İş üzrə Dövlət Komitəsinin www.diaspora.gov.az domen adlı İnternet resursu əslində özünün funksionallığı ilə seçilməli olsa da bunu demək mümkün deyil. Qurumla əlaqə məsələsində yalnız ümumi imkanlar təqdim edilir. 13 bölmədən yalnız 6-sı üzrə bilgilər verilir. Həm də bu bilgilərin tam olduğunu söyləmək mümkün deyil. Yerdə qalan bölmələr üzrə isə heç bir bilgi yoxdur. Hiss olunur ki, bilgilərin saytda yerləşdirilməsi üçün elə də ciddi səy göstərilmir. Yalnız gündəlik bilgilər baxımından sayt elə də geri qalmır. Düzdür, burda da xüsusi çevikliyin olduğunu demək olmaz. Ümumilikdə isə saytın durumu aşağıdakı kimidir.

1. Qurum haqqında bilgilər bölməsi üzrə beş bənddən 4-ndə gərəkli informasiyalar verilib. Ancaq qurumun rəhbərləri haqqında bilgilər yetərli deyil. Hətta hazırkı sədr haqqında bilgilərin təqdim edilmə üsulu elədir ki, onlar oxumaq belə mümkün deyil. Əvvəlki rəhbərlər haqqında isə ümumiyyətlə bilgi yoxdur.

2. Ziyarətçilərin əks əlaqəsi üçün qurumun ünvanı, marşrut və sxemi təqdim edilib. Ancaq bura gəlmək üçün ictimai nəqliyyat barədə bilgi verilmir. Ümumi xarakterli telefon və faks nömrələri, e-poçt ünvanları və onlayn müraciət forması da təqdim edilir. Yalnız bütün bunlar ümumi xarakterlidir və ayrı-ayrı struktur bölmələri ilə əlaqə imkanları haqqında bir bilgi verilmir.

3. Qurumun struktur vahidləri haqqında sxem yarımçıq təqdim edilir. Struktur bölmələri və regional qollar haqqında heç bir bilgi yoxdur. Nə onların ünvanları, nə rəhbərləri, nə də ki, səlahiyyət çərçivələri barədə bilgi verilmir.

4. Rəhbər və digər rəhbər işçilər haqqında bioqrafik bilgilər demək olar ki, yoxdur. Yalnız rəhbərin bioqrafiyası şəkil formasında verilib və oxunması çətindir. Əks əlaqə üçün ümumi imkanlar yetərli sayıla bilər. Ancaq xüsusi imkanlar heç yoxdur.

5. Cari informasiyalar məsələsində saytda müəyyən diqqət çəkən məqamlar var. Ancaq qurumdaxili əmr və sərəncamlar, onların reyestri, qurumun həyata keçirdiyi proqram və layihələr haqqında bilgi yoxdur.

6. Ümumi dövlət büdcəsi ilə bağlı hər hansı bilgi yoxdur.

7. Qurum tərəfindən təklif edilən xidmətlər haqqında təsüf ki, heç bir bilgi verilmir.

8. Boş iş yerləri və işə qəbulla bağlı bilgilər də təqdim edilmir.

9. Sahə işçilərinin əmək haqları bölməsi də tamamilə boşdur.

10. Daha bir təqdim edilməyən informasiya vətəndaşların qəbulu şərtləri və qəbul günləri (saatları) ilə bağlıdır.

11. Tender və yarışmalar haqqında da eyni sözləri söyləmək mümkündür.

12. Qurumun norma- (qanun)yaratma fəaliyyəti haqqında heç bir bilgiyə rast gəlinmir.

13. Saytın texniki imkanları elə də yüksək dəyərləndirilə bilməz. Funksionallığı yüksəltmək və saytı çağdaş texnoloji tələblərə uyğunlaşdırmaq zərurəti var. Saytda onlayn yazışma forması təqdim edilir. Ancaq abunə imkanı yoxdur.