Azərbaycan Respublikası Mərkəzi Seçki Komissiyasının www.msk.gov.az domen adlı İnternet saytı, icmal hissədə də qeyd etdiyimiz kimi heç də ondan gözlənildiyi qədər diqqət çəkən deyildir. Sayt özünün çevikliyi baxımından da diqqət çəkmir. Həm də əks əlaqə imkanları heç də yetərli deyildir. Bütün bunlarla bərabər bir sıra bölmələr üzrə ümumiyyətlə bilgi yoxdur. Amma bu heç də o demək deyil ki, sayt tamamən uyğunsuz durumdadır. Yəni demək istədiyimiz odur ki, saytı təkmilləşdirmə imkanları vardır. Buna görə də aşağıda bəzi tövsiyələrimizi təqdim edirik.
1. Qurum haqqında bilgilərə onun tarixi haqqında bilgi də əlavə etmək lazımdır. Həm də ona daha öncə başçılıq etmiş şəxslər barədə bilgilərin təqdim edilməsi faydalı olardı.
2. Ziyarətçilərin əks əlaqəsi üçün qurumun ünvanının marşrut və sxemi, həmçinin ora getmək üçün ictimai nəqliyyat barədə bilgi verilməsi vacibdir.
3. Qurumun strukturunun sxemi təqdim edilməlidir. Həm də struktur bölmələrinin başçıları barədə bilgilərin verilməsi gərəklidir.
4. Rəhbər və digər rəhbər işçilər haqqında bioqrafik bilgiləri dolğun şəkildə təqdim etmək lazımdır. Struktur bölmələrinin rəhbərləri barədə də bilgilər verilməlidir. Həm də onlarla əks əlaqə imkanlarını daha dolğun təqdim etməyə gərək var.
5. Cari informasiyalar məsələsində saytın daha çevik olması gərəkdir. Saytda qurumdaxili əmr və sərəncamlar, həm də onun icra etdiyi proqram və layihələr barədə də bilgilərin təqdim edilməsinə ehtiyac var.
6. Yaxşı olardı ki, büdcə ilə bağlı məsələlər haqqında saytda bilgilər öz əksini tapsın.
7. Qurumun təklif etdiyi pullu xidmətlər və onlardan istifadə üsulları barədə də bilgi verilməsi zəruridir.
8. Yaxşı olardı ki, boş iş yerləri və işə qəbulla bağlı bilgilər təqdim edilsin.
9. Sahə işçilərinin əmək haqları barədə də eyni sözləri demək olar.
10. Vətəndaşların qəbul şərtləri və qəbul günləri (saatları) haqqında bilgilər təqdim olunması gərəkli informasiyalardandır.
11. Tender və yarışmalar haqqında bilgilərin də daxil edilməsi tövsiyə olunur.
12. Qurumun norma- (qanun)yaratma fəaliyyətinin saytda öz əksini tapmasına ehtiyac var.
13. Saytın texniki imkanlarını genişləndirmək, onu daha funksional hala gətirmək, onlayn yazışma forması və abunə imkanı əlavə etmək lazımdır.