Azərbaycan Respublikası Nazirlər Kabinetinin www.cabmin.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası Nazirlər Kabinetinin www.cabmin.gov.az domen adlı İnternet saytı, icmaldan da göründüyü kimi, heç də ümidləri doğrultacaq səviyyədə deyil. Sayt demək olar ki, məzmun baxımından zamandan çox geri qalır. Üstəlik çağdaş informasiya tələbatçısının istəklərinə cavab verəcək durumda da deyil. Bu baxımdan saytın üzərində köklü iş aparılması vacibdir. Əslində isə saytın yenidən qurulması daha doğru olardı. Bununla belə hesab edirik ki, bu saytı təkmilləşdirmək də olar. Ona görə də aşağıda bəzi tövsiyələrimizi təqdim edirik.

1. Qurum haqqında bilgilər bölməsində qurumun tarixi, qanunverici əsasları, səlahiyyət çərçivəsi, rəhbərləri barədə geniş bilgi verilməsi tövsiyə olunur.

2. Ziyarətçilərin əks əlaqəsi üçün qurumun ünvanı, marşrut və sxemi, ora gəlmək üçün ictimai nəqliyyat barədə də bilgi verilməsi gərəklidir. Həm də telefon və faks nömrələrini göstərmək lazımdır.

3. Qurumun struktur vahidləri haqqında informasiyalar gərəklidir və təqdim edilməsi tövsiyə olunur.

4. Rəhbər, rəhbər işçilər və onlarla əks əlaqə ilə bağlı bilgilərin təqdim edilməsinə ehtiyac duyulur.

5. Cari informasiyalar məsələsində saytın daha çevik olması vacibdir. Həm də qurumdaxili əmr və sərəncamlar və onların reyestri, həmçinin quruma aid hər cür başqa informasiyalar, qurumun icra etdiyi proqram və layihələr barədə bilgi verilməlidir.

6. Yaxşı olardı ki, büdcə ilə bağlı məsələlər haqqında saytda bilgi verilsin.

7. Qurumun təklif etdiyi xidmətlər təqdim edilməsi faydalı olan informasiyalardandır.

8. Boş iş yerləri və işə qəbulla bağlı bilgilərin verilməsi lazımlıdır.

9. Yaxşı olardı ki, sahə işçilərinin əmək haqları barədə məlumatlar əks olunsun.

10. Vətəndaşların qəbul şərtləri və qəbul günləri (saatları) haqqında da eyni sözləri demək olar.

11. Tender və müsabiqələrin keçirilməsi ilə bağlı bilgilərin təqdim edilməsi yaxşı olardı.

12. Qurumun norma- (qanun)yaratma fəaliyyətinin saytda öz əksini tapması faydalı olardı.

13. Saytın texniki imkanları sırasına abunə və onlayn yazışma forması da əlavə edilməlidir.