Azərbaycan Respublikası Milli Teleradio Şurasının www.ntrc.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası Milli Teleradio Şurasının www.ntrc.gov.az domen adlı İnternet saytı, icmal hissədə də qeyd etdiyimiz kimi, o qədər də yüksək rəy yaratmır. Burada cari informasiyaların çevikliyindəki axsamalardan tutmuş vətəndaşların qəbuluna və büdcə bilgilərinə qədər bir çox bölmələrdə bilgi yetərsizliyi müşahidə edilməkdədir. Bununla belə, saytın təkmilləşdirilməsi də mümkündür və elə ona görə də aşağıda bu yöndə bəzi tövsiyələrimizi təqdim edirik.

1. Qurum haqqında bilgilər tam və dolğun hesab edilə biləcəyindən elə bir tövsiyəyə gərək yoxdur.

2. Ziyarətçilərin əks əlaqəsini asanlaşdırmaq üçün qurumun ünvanının marşrut və sxemini, həmçinin ora gələn ictimai nəqliyyat barədə bilginin verilməsi faydalı olardı.

3. Qurumun struktur vahidləri sxem şəklində göstərilməli, həmçinin, onların ayrıca ünvanları və səlahiyyət çərçivələri barədə bilgi təqdim edilməlidir.

4. Əks əlaqə imkanlarının bir qədər daha dəqiq və dolğun şəkildə təqdim edilməsi lazımlıdır. Həm də struktur bölmələrinin rəhbərləri barədə bioqrafik bilgilər verilməlidir.

5. Cari informasiyalar bölməsində qurumdaxili əmr və sərəncamlar, həmçinin onun həyata keçirdiyi proqram və layihələr barədə də bilgi verilməsi tövsiyə olunur.

6. Yaxşı olardı ki, büdcə ilə bağlı məsələlər haqqında informasiyalar təqdim edilsin.

7. Qurum tərəfindən təklif edilən xidmətlər barədə bilgilər təqdim edilməsi gərəkli olan informasiyalar sırasındadır.

8. Boş iş yerləri və işə qəbulla bağlı bilgilər sırasına işə qəbul qaydaları, qəbul komissiyaları, qəbulla bağlı mübahisələrin həlli yolları, qəbulun sonucları barədə də bilgilərin əlavə edilməsi yaxşı olardı.

9. Sahə işçilərinin əmək haqları barədə bilgilərin təqdim edilməsi də tövsiyələr sırasındadır.

10. Vətəndaşların qəbul qaydaları, qəbuldan imtinanın əsasları və qəbulla bağlı mübahisələrin həlli yolları barədə də bilgilərin təqdim edilməsi gərəklidir.

11. Yaxşı olardı ki, tender və yarışmalar haqqında bilgilər saytda əks olunsun.

12. Qurumun norma- (qanun)yaratma fəaliyyətinin işıqlandırılması da gərəklidir.

13. Saytın texniki imkanlarını daha da genişləndirmək, tərtibatını bir qədər də yaxşılaşdırmaq yaxşı olardı.