Azərbaycan Respublikası İnsan Hüquqları üzrə Müvəkkilinin www.ombudsman.gov.az domen adlı İnternet saytının fəaliyyətinin təkmilləşdirilməsi ilə bağlı TÖVSİYƏLƏR

Azərbaycan Respublikası İnsan Hüquqları üzrə Müvəkkilinin www.ombudsman.gov.az domen adlı İnternet saytı, icmaldan da göründüyü kimi, bir sıra göstəricilərinə görə yaxşı durumda olsa da bəzi bölmələr üzrə informasiya qıtlığı nəzərdən qaçmır. Xüsusən də şəffaflıq məsələlərinə aidiyyatı olan bilgilərin yoxluğu heç də ürəkaçan hal sayıla bilməz. Bununla belə, saytı nəzərdən keçirəndə onun sadəcə dolğunlaşdırılması üçün imkanların varlığı gözdən qaçmır. Elə ona görə də bu sayt təkmilləşdirilə bilər və biz də aşağıda bu yöndə təkliflərimizi veririk.

1. Qurum haqqında bilgiləri tam və dolğun sandığımızdan ona aid tövsiyəyə gərək duyulmadığı qənaətindəyik.

2. Ziyarətçilərin əks əlaqəsini asanlaşdırmaq üçün qurumun ünvanının marşrut və sxemi, ora gəlmək üçün ictimai nəqliyyat barədə də bilgi verilməsi gərəklidir.

3. Qurumun struktur vahidlərini sxem şəklində də göstərmək lazımdır. Üstəlik struktur vahidlərinin rəhbərləri, onların ünvanları və əlaqə vasitələri barədə də bilgi verilməlidir.

4. Digər rəhbər işçilər haqqında da bioqrafik bilgilər verilməlidir. Həm də əks əlaqə imkanlarını xüsusiləşdirmək lazımdır.

5. Cari informasiyalar haqqında bilgilərə qurumun icra etdiyi proqram və layihələr, qurumdaxili əmr və sərəncamlar, onların reyestri barədə də informasiyaların əlavə edilməsi tövsiyə olunur.

6. Yaxşı olardı ki, büdcə ilə bağlı məsələlər haqqında informasiyalar saytda yer alsın.

7. Qurumun təklif etdiyi pullu xidmətlər və onların qiymətlərinin formalaşması, həmçinin onlardan istifadə yolları barədə də bilgi verilməsi zəruridir.

8. Boş iş yerləri və işə qəbulla bağlı bilgilərin təqdim edilməsi yaxşı olardı.

9. Sahə işçilərinin əmək haqları barədə bilgilərin təqdim edilməsi də tövsiyə olunur.

10. Vətəndaşların qəbul şərtləri və qəbul günləri (saatları) barədə də bilgilərin verilməsinə ehtiyac duyulur.

11. Yaxşı olardı ki, tender və yarışmalar haqqında bilgilər də əks etdirilsin.

12. Qurumun norma- (qanun)yaratma fəaliyyətinin işıqlandırılması da gərəklidir.

13. Saytın texniki imkanları sırasına abunə təklifi də əlavə edilməlidir.