Bərdə Bələdiyyəsinin www.berde.belediyye.az domen adlı İnternet saytının monitorinqinin yekunu /İCMAL/

Bərdə Bələdiyyəsinin www.berde.belediyye.az domen adlı İnternet resursu da daha öncə müşahidə etdiyimiz bələdiyyə saytları kimi qurulub unudulanlar sırasındadır. Bu saytın yalnız bir fərqi var ki, özündən öncəkilərə nisbətən daha zəngindir. Ancaq nəzərə alsaq ki, sayt 2008-ci ilin may ayından yenilənmir, o zaman oradakı bilgilərin də bir işə yaradığını qəti şəkildə demək olmaz. Misal üçün, mümkündür ki, bələdiyyə üzvləri dəyişmiş olsun. Yaxud da bələdiyyə qanunvericiliyinə dəyişiklik edilmiş olsun. Bununla belə yenə də mövcud saytı müşahidə edib gördüklərimizi aşağıda diqqətə çatdırırıq.

1. Qurum haqqında bilgilər bölməsində demək olar ki, gərəkli bilgilər yer alıb. Burada çatışmayan bələdiyyəyə daha öncə başçılıq etmiş şəxslər barədə bilgilərdir.

2. Ziyarətçilərin əks əlaqəsi üçün qurumun ünvanı, telefon nömrələri, onlayn müraciət forması verilir. Ancaq ora getmək üçün marşrut və sxem, həm də ictimai nəqliyyat barədə bilgi yoxdur.

3. Qurumun struktur vahidləri haqqında sxem təqdim edilmir. Sadəcə bir sözlü bilgi verilir. Struktur vahidlərinin səlahiyyət çərçivələri və ünvanları barədə də bilgi təqdim edilmir.

4. Rəhbər və digər rəhbər işçilər haqqında bioqrafik bilgilər tamdır. Onlarla əks əlaqə üçün ümumi imkanlar təqdim edilir. Ancaq struktur vahidləri ilə əlaqə imkanları barədə bilgi verilmir.

5. Cari informasiyalar məsələsində sayt zəmanədən geri qalır. Ən yeni xəbər 2008-ci ilin 27 may tarixinə aiddir.

6. Qurumun büdcəsinin ayrıntıları və onun icrası haqqında heç bir bilgi verilmir.

7. Qurum tərəfindən təklif edilən xidmətlər haqqında informasiyalar da saytda öz əksini tapmayıb.

8. İşə qəbul qaydaları və boş iş yerləri haqqında da eyni sözləri demək mümkündür.

9. Təəssüf ki, sahə işçilərinin əmək haqları ilə bağlı da heз bir məlumat verilmir.

10. Eyni sözləri vətəndaşların qəbul şərtləri və qəbul günləri (saatları) barədə də demək olar.

11. Tender və yarışmalar haqqında saytda heç bir bilgiyə rast gəlinmir.

12. Qurumun norma- (qanun)yaratma fəaliyyəti haqqında heç bir bilgi yoxdur.

13. Saytın texniki imkanları normaldır. Burada əks əlaqə üçün onlayn müraciət forması da var.