Azərbaycan Respublikası Binəqədi Rayon İcra Hakimiyyəti www.binegedi-ih.gov.az domen adlı İnternet saytının monitorinqinin yekunu /İCMAL/

Azərbaycan Respublikası Binəqədi Rayon İcra Hakimiyyəti  www.binegedi-ih.gov.az domen adlı İnternet resursu həm görünüş baxımından həm də, əlavə informasiyalar baxımından müsbət təsir bağışlayır. Həmçinin saytın monitorinq etdiyimiz bir çox icra hakimiyyəti saytlarından seçilməsi də nəzərdən qaçmır. Lakin bunlarla yanaşı saytda çatışmayan əsas bilgilər də var. Aşağıda saytın tərkibində müşahidə etdiklərimizi bölmələr üzrə təqdim edirik.

1.    Qurum haqqında icra hakimiyyətinin əsasnaməsi və qurumun başçısının tərcümeyi-halı təqdim edilir. Lakin quruma bu günədək başçılıq etmiş şəxslər barədə isə heç bir bilgi təqdim olunmur. Rayon haqqında isə ətraflı bilgilər (tarixi, mədəniyyəti, coğrafi mövqeyi və s) saytda öz əksini tapmışdır.

2.    Ziyarətçilərin əks əlaqəsi üçün qurumun ünvanı, telefon və faks nömrələri, e-poçt ünvanları verilir. Lakin quruma başqa yerlərdən getmək üçün marşrut və ictimai nəqliyyat haqqında bilgilər təqdim edilmir.

3.    Qurumun strukturunun sxemi təqdim edilir. Lakin struktur haqqında sözlü bilgilərə rast gəlinmir.   

4.    Rəhbər və rəhbər işçilər, onlarla əks əlaqə haqqında təqdim edilən bilgilər qurumun başçısının bioqrafiyası və ayrı-ayrı struktur bölmələrinin rəhbərləri ilə əks əlaqə imkanlarıdır. Təqdim edilməyən bilgilər isə struktur bölmələrinin rəhbərləri haqqında bioqrafik bilgilər, icra hakimiyyətinin rəhbəri ilə əks əlaqə imkanları və vətəndaşların müraciətlərinə baxılma qaydaları haqqındadır.

5.    Cari informasiyalar baxımından isə sayt çox geri qalır. Təqdim edilən en son bilgi isə 22 dekabr 2011-ci ilə aiddir.

6.    Təəssüf ki, ümumi dövlət büdcəsinin icra hakimiyyətinə aid hissəsi və onun icrası haqqında bilgilər saytda öz əksini tapmayıb.

7.    Qurum tərəfindən təklif edilən xidmətlər haqqında heç bir bilgi yoxdur.

8.    Boş iş yerləri və işə qəbulla bağlı bilgilər barədə də eyni sözləri demək mümkündür.

9.    Təqdim edilməyən daha bir məlumat isə qurumunun sahə işçilərinin əmək haqları barədədir.

10.    Vətəndaşların qəbul şərtləri və qəbul günləri (saatları) barədə bilgilər öz əksini tapmışdır.      

11.    Təəssüf ki, tender və yarışmalar haqqında hər hansı bilgi verilmir.

12.    Saytın texniki imkanları normal sayılacaq səviyyədədir. Lakin onlayn müraciət forması təqdim edilsə də abunə imkanı təqdim edilmir.